Námskeið: Notkun SQL til vinnslu landupplýsinga, 20. og 21. nóvember

Notkun SQL til vinnslu og greiningar á landupplýsingum í gagnagrunnum
haldið 20. og 21.  nóvember í Háskóla Íslands

Námskeið um notkun SQL fyrispurnamálsins við vinnslu landupplýsinga

LÍSU samtökin héldu árin 2015 og 2016 sérhæfð námskeið í notkun SQL fyrirspurnarmálsins í vinnu með landupplýsingar beint í gagnagrunnum. Þessi námskeið voru vel sótt og bjóðum við nú aftur upp á þau. Mikið hagræði getur verið af því að geta unnið beint með gögnin í gagnagrunnum og þau svo verið aðgengileg í GIS kerfum.
Takmarkaður fjöldi kemst að þar sem gefinn er góður tími fyrir verklega kennslu. Þátttakendur fá námskeiðsgögn nokkru fyrir námskeið til þess að geta undirbúið sig betur.

Í undirbúningi er að halda framhaldsnámskeið á næsta ári, ef áhugi er fyrir hendi. Þeir sem hafa áhuga eru beðnir um að láta vita og hvað það er helst sem þeir vilja að verði tekið fyrir á námskeiðinu.

Efnistök á námskeiðinu 20. og 21. nóvember
Venslagagnagrunnar eru algengir til geymslu á landupplýsingum en í flestum tilfellum þá er GIS hugbúnaður notaður til að setja inn gögnin, breyta þeim og vinna landfræðilegar greiningar. Flestir stærri gagnagrunnframleiðendur bjóða upp á viðbót við gagnagrunnana þannig að hægt er að vinna með landupplýsingar með SQL fyrirspurnarmáli. Með því að nota SQL þá gefst möguleiki á að því að vinna með gögnin beint án þess að nota sérstök GIS kerfi en gögnin eru samt sem áður aðgengileg til vinnslu í GIS kerfum.

SQL fyrirspurnarmálið er sambærilegt á öllum stærri gagnagrunnum en nokkur munur getur verið á sértækum fyrirspurnum í SQL fyrir landupplýsingar þó svo að aðferðafræðin sé sú sama. Á námskeiðinu verður kennt á PostgreSQL gagnagrunn með PostGIS viðbót. PostgreSQL er opinn og ókeypis hugbúnaður og er ætlast til að nemendur mæti með fartölvu á námskeiðið með uppsettan PostgreSQL/PostGIS gagnagrunn.

Fyrri dagur

Fyrri daginn verður farið yfir grunnatriði í SQL fyrir vinnslu á landupplýsingum í PostgreSQL.
Uppbygging staðgagnagrunns í PostgreSQL/PostGIS. Uppbygging “Geometry” gagnatags fyrir staðgögn og hvað er í taginu (punktar, línur, polýgonar, bogar o.s.frv.), innsetning staðgagna, hnitakerfi, varpanir á milli hnitakerfa, rúmtenging (spatial join),  einfaldar landfræðilegar fyrirspurnir (næsti nágranni, hvað er fyrir innan?, hvað er fyrir utan?), staðlykill (spatial index). Setja gögn út í “shape skrá” eða á annað gagnasnið. Tenging GIS kerfa við PostgreSQL/PostGIS.

Seinni dagur

Seinni daginn verður farið í gagnavinnslu og úrvinnslu gagna. Notkun falla til að búa til og vinna með staðgögn t.d. búa til búffer, reikna þyngdarpunkt, sameina t.d. pólygona, nota pólygona til að klippa gögn o.s.frv. PostGIS föll (functionir) ásamt hefðbundnum SQL skipunum og föllum eru notuð til að búa til ný gögn út frá fyrirliggjandi gögnum.

Villuleit í “geometry dálki” og samanburður á milli “geometry” dálka, hvort þeir eru eins eða ekki. Sannprófun á staðgögnum. View fyrir gögn sem eru staðvensluð og/eða með hefðbundnum venslum. Notkun á “triggerum” þar sem staðvensl eru notuð til að uppfæra gögn.

Fyrir undirbúning námskeiðsins er nauðsynlegt að fá upplýsingar um þekkingu væntanlegra þátttakenda á gagnagrunnsfræðum og landupplýsingavinnslu. Gert er ráð fyrir að þátttakendur hafi þekkingu á helstu skipunum í SQL og  þekki til landupplýsingavinnslu.

Staður og stund

Námskeiðið verður haldið dagana 20. og 21. nóvember 2018  í Háskóla Íslands. Kl 9:00-17:00 báða dagana.

 Leiðbeinandi er Tryggvi Hjörvar, gagnagrunnssérfræðingur hjá Veðurstofu Íslands.

Lágmarksfjöldi þátttakenda er 8 manns og hámark 12 manns. Þeir sem hafa áhuga á að sækja námskeiðið vinsamlegast beðnir um að tilkynna um þátttöku eins fljótt og unnt er. Skráning er bindandi frá og með 5. nóvember.

Þátttökugjöld:

LÍSU félagar:      kr  78.000 fyrir báða dagana
Aðrir:    kr  98.000 fyrir báða dagana
Utan vinnumarkaðar:  kr  58.000 fyrir báða dagana
Athugið 25 % hækkun á þátttökugjöld eftir 5. nóvember

 Skráning: lisa@landupplysingar.is

Vinsamlegast sendið auglýsinguna áfram til annarra sem kynnu að hafa áhuga

Kennt er PostgreSQL gagnagrunn með PostGIS viðbót. PostgreSQL er opinn og frjáls hugbúnaður.