LÍSA varð þrítug í mars síðastliðnum og því héldum við hálfsdags-ráðstefnu föstudaginn 5. apríl. Vel var mætt og áttum við góðar stundir saman.
Þórdís stjórnarformaður opnaði ráðstefnuna með að þakka þeim brautryðjendum sem mestan þátt áttu í að stofna LÍSU á sínum tíma og opna þannig fyrir þeirri vegferð sem landupplýsingar eru á núna á Íslandi. Þau Geir Þórólfsson, Heiðar Hallgrímsson, Þorvaldur Bragason, Magnús Gíslason og Þorbjörg Kjartansdóttir voru heiðruð með uppklappi.
Þorvaldur Bragason hélt erindi um hlutverk LÍSU í fortíð og nútíð og Páll Hilmasson hjá Gagnaþjónustu Reykjavíkur hélt erindi um m.a. forritaskil fyrir staðföng í Reykjavík. Svo komu Valdimar Ásbjörn, Emil Snorri og Hendrik frá Veitum og gáfu innsýn inn í hvernig landupplýsingar eru nýttar á mismunandi sviðum hjá Veitum s.s. hvernig landupplýsingakerfin hýsa mikilvæg grunngögn sem eru samþætt við önnur kerfi innanhúss sem utan, ásamt því að sýna hvernig landupplýsingagögn eru nýtt í hermannir og aðrar lausnir. Eftir hlé voru pallborðsumræður með Tryggva Má frá fasteigasviði HMS, Bergþóru Þorkelsdóttur forstjóra Vegagerðarinna og Ágústi Sigurðssyni forstjóra Lands og skógar. Þar sköpuðust líflegar umræður um mikilvægi þess að stjórnvöld geri sér grein fyrir mikilvægi landupplýsinga og hlutverk LÍSU í því.
Að ráðstefnu lokinni gæddu gestir sér á freyðivíni og afmæliskökum.
